ليه انا زملكاااااااوى؟

الدقيقه 90 على ساعة استاد القاهره وانا فى ماتش الاهلى والزمالك اللى فات والحكم خلاص هينهى المباراه والاهلى متقدم كالعاده بهدف ..خلصت المباراه وكالعاده خرج جمهور الزمالك مكسور الخاطر بعد هزيمه اخرى من الغريم التقليدى واستمرار مسلسل الهزائم فى الديربى بس المره دى فاض بيا الكيل وبدات افكر واسال نفسى : هو ليه انا زملكاوى؟
وليه صابر على اللى بيحصل وليه بعد لما اللعيبه بتخسر بشجعهم تانى وبينى وبينكم كنت عارف ان الاهلى هيكسب بس رحت اشجع الفريق على امل انهم يطلعو رجاله ويكسبوا المره دى بس كالعاده كسفوا الجمهور وخسروا
القضيه مش قضيه ماتش واحد او اتنين القضيه ان اللى بيحصل دلوقتى اصبح لا يطاق ولم يحدث ان خسر الزمالك هذا الكم من المباريات فى موسم واحد بل فى الدور الاهول من عمر الدورى فبالحسابات الزمالك خسر هذا العام11 مباراه فى ظرف 4 شهور هل هذا معقول هل من الممكن ان نصدق ان الزمالك الكبير صاحب الالقاب والبطولات يخسر من الاوليمبى الصاعد وبترول اسيوط والاسماعيلى وحرس الحدود وديناموز واسيك ابيدجان الايفوارى ويخسر من الاهلى 3 مباريات فى 4 شهور بل والادهى انه خسر من فريق يدعى بنى عبيد احد انديه الدرجه الثالثه واخرج الزمالك حامل لقب الكاس من البطوله مبكرا بعد ان كان امال جماهير الزمالك معلقه على هذه البطوله يعنى كله ده بيحصل ونلاقلى جمال حمزه عاوز فلوس ابوالعلا مش عاجبه ميعاد التدريب والتانى عنده برد فى رجليه واللى مبيروحش التدريب واللى واللى واللى.. لا وكمان النادى بيعانى من ديون ومفيش مدير فنى ولا فى مجلس اداره مستقر ..طيب يعنى انا لو حبيت اكلم حد فى نادى الزمالك هكلم مين لا وكمان الزمالك تعاقب عليه 8 مجالس ادارات فى خمس سنوات ازاى يا جدعان دى عمرها ما حصلت وكمان 11 مدرب دربوا الفرقه منهم المدير الفنى الجديد اللى ربنا يكون فى عونه و40 لاعب جم خادو مئات الملايين والله مئات الملايين وحسب احصاء اجور لاعبى الفريق الاول لكره القدم بنادى الزمالك فان اللاعبين بيحصلوا على 280 مليون جنيه ....طبعا انا عارف رد فعلك هيكون ايه لما تشوف الرقم ده والحصيله صفر ولاعيبه معندهاش دم ولا انتماء للنادى وعاوزين فلوس وبس ووووووو
طيب وبعدين؟ وايه الحل؟
فكرت فى السؤال ده مليون مره ومش لاقلى اجابه ومش عارف حاجه بس اللى انا متاكد منه حاجتين الحاجه الاولى ان المتسبب الاول والرئيسى فى اللى بيحصل للزمالك المهندس حسن صقر بسبب انه فاكر نادى الزمالك ناديه هوه وعاوز ينتقم لنفسه بعد سقوطه فى انتخابات النادى ومعاه الاخ مرتضى منصور اللى جرجر اسم النادى فى المحاكم وطبعا الاعلام الاحمر اللى كله هدفه يفضل الزمالك زى ماهوه
اما الحاجه التانيه ان اصلاح الاحوال لن تتم الا عبر سنوات عديده .. وحتى يعود الزمالك كبيرا كما كان لندعو الله ونقول : لك الله يا زمالك

يا حرام
معلش بكره الحاله تتعدل اعمل مظاهره ممكن تجيب نتيجه
بس يا تري هتكون النتيجه ايه سته واحد ؟

هههههههههههههههههههه بس جميله اوى عنده برد فى رجيله اكيد نسي يلبس الشراب

انا بجد نفسى حد يقولى راي ينفع ليه الحل ياجدعااااااااااان